1Cor 10 | DOB | STEP | Gosegwao tubudao wada nuwa'i'isidi 'aene lowaenei tuta nina sena mwatui daitaya sitautauya, ta pwana 'enega Yaubada 'ianuganedi, ga wate ola solanaya 'idi 'eda 'iguinuwena ga 'enega siabala mali esenaya.

1 Corinthians 10

Bwagobwago mali 'ebe emisao 'ediya

1 Gosegwao tubudao wada nuwa'i'isidi 'aene lowaenei tuta nina sena mwatui daitaya sitautauya, ta pwana 'enega Yaubada 'ianuganedi, ga wate ola solanaya 'idi 'eda 'iguinuwena ga 'enega siabala mali esenaya. 2 'Enega pwana be ola 'ediyega 'idi bapitaiso silobena 'aene Mosese 'ana tomuliyao, 3 ta wate 'adi masula be 'adi bwasi maibo'ana galewega silobena yaluyaluwadi manuna, ta 'adi bwasi si'ewa'ewa gulewa 'ebweu 'enega, ta gulewa nina galewega ma'edi sitautauya, 'ana esana Keliso. 5 Ta esi Yaubada nigeya 'igwaugwausowala tubudao nidi manudi, 'enega mitawa nina 'enaya yaudi simwawasa, ga kokowadi nada siebesinedi.

6 Ta taudi 'ebe'ita 'edaya be 'aene geya'abo to'umalina manuna tanuwanuwa, 7 ta wate geya'abo tabwagobwago mali 'ebe emisao 'ediya, nadigega taudi mitawaya siguinuwena. Buki Tabu 'ena taudi manudi 'isimana, 'igwae, “Tomota nidi simiyatowa ga si'e'ai ta sinumanuma, ga muliyega sitoolo ga siguinuwa besobeso.” 8 Ta wate siloeloelata, 'enega 'asiyata 'ebweuna 'enaya site tuweniti tili tausani 'ediyega Yaubada 'iloemwawasidi. Gete 'ebe'ita 'edaya be 'aene geya'abo taloeloelata.

9 Ta wate Yaubada 'ana 'oata'oata sisa'una ga mwata 'enega 'iloemwawasidi. Getei 'ie'iteda 'aene geya'abo 'abo'ada wate nadigega taguiguinuwa'esa. 10 Ta wate Yaubada silomugiyena, ga 'enega 'ebweu anilose 'ietunenama ga 'igieto'umaliyedi 'idi lomugi nidi manuna. 'Ebe'ita gete 'edaya be 'aene geya'abo talomulomugi. 11 'Ebe'ita nidi getedi maibo'adi Buki Tabu 'ena si'etoladidi be 'aene gete tuga 'abo'ada 'epata auwauda e'isa nidi mwaudi tada nuwa'i'isidi, be geya'abo loegesi nidi taguiguinuwedi.

12 'Enega 'abo yaita 'oyo 'unuwena 'aene ma imu waiwai 'utootoolo, 'uda 'ita'i'isiyo be geya'abo 'uneeneta, 13 manuna 'ebe toona nidi 'ediyega Seitani 'itootoomi, maibo'ada wate 'itootooda nadigega, ta esi Yaubada 'ina loina 'isa'una be geya'abo Seitani 'itootoo wawasaeda, ta 'abo ta'alama'i'ita 'iabe 'eda bobo'ana 'ie'itada be 'enega 'ebe toona nidi taewaiwai sinedi.

14 Gosegwao, nuwanuwagu sinabwana be mali 'ebe emisao waguitoyasedi. 15 'Omi ma imi mwalatoi, 'enega 'igu ona gete manuna wada nuwanuwa sinabwana. 16 Manuna 'eguma sakalameni manuna talokagutoki Yaubada 'enaya be tanunuma, nate Keliso lalanega 'igiebobo'aneda be Keliso ma'eda tae'ebweuna. Nadigega beledi, 'abo tagitomwa be ta'a'ani, beledi nina 'enega Keliso ma'eda tae'ebweuna, manuna tauna oona tae'ani.

17 Beledi nina 'ebweuna 'enega maibo'ada ta'e'ai, 'enega Keliso oona 'enaya taeboda 'ebweuna. 18 Nadigega tuga me Isileli yauyaudi 'idi taliyao siunudi Yaubada manuna ga si'enidi, 'enega Yaubada ma'edi sieboda 'ebweuna.

19 Ona'ai'aila, masula nidi taudi tomiya apwesa si'ebwa'ebwaya mali 'ebe emisao 'ediya, ta wate 'idi 'ebe emisao nidi, nai kaiwe nai gulewa, yage besobeso tuga, ta nigeya 'idi waiwaimo. 20 Ta wate guinuwa nidi taudi tomiya apwesa yage nidi manudi siguiguinuwa, nigeya Yaubada manuna sinuwanuwa, ta esi Taumudumudulele magosenao manudi. 'Enega geya nuwagu be mali 'ebe emisao manudi waguiguinuwa, 'abona nai Taumudumudulele gosenao ma'emiyao waeboda 'ebweuna.

21 Nigeya 'ana 'ita bobo'ana 'eguma 'Inapwana 'ana keiga 'enega wanumanuma be 'ina 'ebe 'e'ai 'enega wa'e'ai ta wate Taumudumudulele 'ina guinuwa waguiguinuwedi, 22 manuna 'Inapwana 'atena wagiegie dededoni. 'Inapwana nina Toewaiwai sana, 'enega geya'abo tagiegie gamwasowali, 'abona nai 'ipe'uda.

Masula nidi mali 'ebe emisao manudi.

23 Yage maibo'adi sawesawedaya be taguinuwedi, ta 'aina yage geya'abo silemelemeda. 24 'Enega 'ilobweneda be guinuwa nidi taguinuwedi gosedao 'adi lema manuna, ta esi geya'abo 'abo'ada tauda 'ada lema manuna. 25 'Enega 'abo yobai esiyona mali tomota 'ediyega wagimwane, geya'abo waenaenaida esiyo nina manuna, ta esi wada 'ani tuga, be geya'abo wanuwanuwa to'umalina to'ase lowa masula nina 'ena siguinuwena. 26 Manuna bale'u maibo'ana ta wate yage maibo'ana bale'uya Yaubada 'ina 'ebe loinao.

27 Ta 'abo tomiya apwesa 'ebweu 'ibwauyeyo be 'utatauya 'ina anuwaya be 'amu masula 'isa'u manuyo, tuga 'u'a'ani, ta geya'abo 'uenaida to'ase lowa 'iguinuwena masula nina 'enaya, be 'enega geya'abo wanuwanuwa mwau manuna. 28 Ta esi 'abo yaita 'isimana masula nina manuna be 'emiya 'igwae, “Taudi 'idi guinuwa Taumudumudulele manuna masula nate 'enega siguinuwena,” geya'abo masula nina 'u'e'ani, 'abona nai tauna tosimana nina 'inuwamwau, nai 'imatauta, 'enega 'oyo wate 'uda nuwamwau, 29 nigeya tauyo 'imu matauta 'enega, manuna 'oyo nigeya Taumudumudulele 'umatamataute, ta esi tosimana nina 'ina matautega.

Ta 'aina tomota sigwae, “Geya'abo 'agu loina wasa'usa'u taudi toneneta 'idi nuwanuwa manuna, 30 ta wate geya'abo taudi silomulomugiyegu. 'Agu masula nina manuna ni'atu yalokagutoki Yaubada 'enaya, ta nigeya 'ebweu wate 'ana to'umalina 'eguya 'imiyami.”

31 Taudi 'idi ona 'ana e'isa gete, 'aene 'ilobweneda be 'ida guinuwa maibo'ana, nai 'ida 'e'ai, nai 'ida numa, nai to'ase wate, 'ediyega Yaubada 'ana esana tagie sinabwa. 32 'Enega geya'abo mali tomota wagiegie nuwamwauyedi, nai me Yudia, nai taudi nigeya me Yudia, nai Yaubada 'ina toekalesiyao, 33 nadigega 'abo'agu yatootoo be 'aene geya'abo taugu 'igu nuwenuwega yaguiguinuwa, ta esi to'ase tomota 'idi nuwanuwa nadigega yada guinuwe tuga, be sida gwausowala, be 'enega 'adi 'etoseyana sida loba Yaubada 'enega.